Hotspot

人仔離岸市場 (offshore market)

2009-07-02T20:56:00.011+08:00

大陸終於都肯公布人仔境外貿易結算辦法。168 有思苦，無痛苦既黃cf就話人仔結算係阿爺要响香港開人仔離岸市場(offshore market) 咁話喎。

係咪咁呢？若果我地睇得明現時最大既離岸市場－即係係美元既離岸市場，Eurodollar market，係點浮出來，就可以睇到家下香港有冇機會搞到個人仔離岸市場出來嘞。

Eurodollar 市場

曾幾何時（7/80年代）蘇聯佬同中東佬都持有大量既美金，但佢地又唔想放係美國。當時紐約以外最大既金融中心就係倫敦，咪存個到囉。又咁啱個陣英鎊有危機，英國政府唔再容許英國銀行用鎊幫海外公司做貿易融資。喂！英國銀行係食海外生意維生，咁唔掂咖喎！既然佢地收埋咁多美金，就把心一橫，用佢來做貿易融資。

但問題就係，你點夠人地老美鬥呀？又話說當時老美有勁多法規，唔鼓勵銀行借美金畀非美國人士／公司既同時，又增加咗當地銀行既經營成本同。英國同歐洲既銀行當然唔受老美法規規管，所以營運成本低D。

商家佬梗係邊到平就去邊到啦！搞到大量美金流去Eurodollar market, 大型銀團都係個到做。但借埋／收埋咁多錢，始終有風險咖！點好呢？於是D行又砌D以美金作交易同結算單位既金融工具玩下，再呃你多D錢啦。愈多人玩個雪球就愈滾愈大，Eurodollar market 玩到家陣仲大過美國本土添！

離岸市場要成功，要有大量既貨幣供應個離岸市場，仲要夠平、夠創新，砌到多D以該幣作結算單位既金融工具。

人仔離岸市場

吹咗一大爛餐，點將佢同人仔拉埋一齊呢？好，逐點擊破。

香港夠唔夠人仔做離岸呢？唔夠！人仔只佔現時香港銀行體系既2％左右，得個幾百億，成事不足，敗事有餘。就算來個double, 再用哂人行同金管局既二千億人仔貨幣互換額度，三千幾億啦好未？大陸五月M1、M 2分別係十八萬億同五十五萬億左右，你自己計下三千億係幾多個巴仙！

除非大陸容許香港吸納其他地方既人仔（我諗都有幾多下咖），再用香港個平臺做野，否則咁既人仔規模，真係無咩大作為。但家下大陸又未畀喎。阿爺個心態好明顯係要用香港做白老鼠，得咗先再放多D野你玩，咁即係又要等三五七年。

人仔貿易融資係咪又真係咁大商機呢？轉個角度來睇，即係香港銀行做人仔貿易融資搵既錢多唔多過佢地因唔做港元／美元貿易融資所唔見既錢錢先？家下港紙咁低息，我諗做人仔生意應該可以賺多D，但條水又唔似勁到可以話齋一味就夠喎。

香港平臺營運成本平唔平？喂大佬，貴過大陸好多喎！存款息口又低過大陸（香港最高個間創興，六個月都係畀0.875%），借貸成本又高（你得咁少人仔，梗貴啦），咁點同onshore 鬥呀？最重要係，有中銀香港作香港同大陸兩個體系既人仔連結（清算行），香港既息咁低，人債又咁少，你做銀行，有多餘既人仔頭寸，苦無出路，只好放返深圳人行賺息（舊底未容許香港銀行互拆，家下條管理辦法就容許嘞！但都係跟SHIBOR 咁上下既rate, 好低啫！存番去深圳人行起碼唔會走數）。

至於人仔金融工具？又係無咩得玩。遠期都只准玩無交割（non-deliverable forward- NDF)…… 點鬥呀？

即係現時既香港人仔市場，用行語講，就係廣度、深度都欠奉，有餘資走返上大陸，砌到個離岸市場出來都係雞肋啦。

結論

冇返三五七年，人仔離岸市場都應該不成氣候，除非……

1. 阿爺肯大手放多D境外既人仔用香港平臺。再減番上年加咗既外匯交易手術費先啦！可以話畀市場聽，我想放錢落來咖！

2. 叫國企出外買野，盡量用香港個平臺做兌換同結算。又或者諗下對外既所謂「無償經濟緩助」（簡稱收買朋友費）用人仔計，再叫進出口行經香港平臺去做兌換，谷D人仔落香港。

3. 係香港推多D 人仔工具。家下先得個二百二十億人債係香港，唔出多D，邊夠畀銀行佬去管理佢本簿呀？而呢樣又係要阿爺肯批先得，又係望天打卦。

即係話，阿爺家下咩都唔做，表示暫未有意放個離岸你做囉！你首先搞好人仔貿易融資，可能批多D畀你，放個離岸你做（對阿爺都有著數，家下咁多人仔印咗出來，唔流咁D出去點得呀？）！

等下啦！

四月以來升市檢討

2009-06-26T19:33:00.011+08:00

小弟才疏（亦財疏）學淺，到家下尚未攪清個市係熊二彈定牛一。睇數據，除咗LIBOR-OIS反映信貸市場已解凍外，其他指標都未覺衰完。另外，通常有些少好轉跡象後，都會鋸多一浸，所以用數據睇，似係熊二彈。但睇圖同技術指標，除咗250 天線未向上爬外，大部份指標都似係牛一。故洛奇大佬稱個市謂水牛市係有原因。水牛者，由水，唔係實體經濟，所炒起也。

其實最緊要係個倉可以保本之餘，仲有些少落袋。操作上，細佬呢幾個月已經無再減倉，反而加咗碼。

唔知係福至心靈，定係拜得神多有神庇佑，touchwood, 齋論股票倉，已追返先前止蝕既損失（唉，十一月四萬億救市前夕斬咗成堆國企，仲要大部份都係基建股、水泥股，你話係咪運滯？）。家下算有繩頭盈利，算係咁啦。

惟做人切忌自滿，務必三省吾身。呢個浪，迄今諗到需改善既有以下三點：

(1) 唔好搏私有化！就算係搏，唔該都見位好走！

二三月個陣，個市跌到趴街，見舊相好光頭顧（舊底玩過佢，入咗後好似未試過帳面有賺，好息累事，後來止蝕斬咗），以$1.50提出私有化。當時無咩點睇市場既反應。因為小弟讀屎片，以為一定即日炒高至$1.4X啦，睇來毋謂。點知原來錯過咗$1.28任買既時間，去到$1.40 先驚為天人，掃咗些貨。

當時既心態係，個市咁趴街，Webb哥仔又話支持私有化，搏得過。

點知，差些少，過唔到，仲停L埋牌，鎖住我一大筆錢，累我見住個市升都只能望門輕嘆，無錢加碼也！

呢個故事既教訓：私有化，玩唔過。就算係搏，見佢有咁上下水位都賺咗都好走嘞！唔好妄想食盡佢，因為隨時會渣都冇，含柒而終！

(2) 定咗出市位，仲咩唔走？跌破出市位，點解仲會入？

跟阿柴爺扑中咗隻巨騰, $3.25買，我覺得應$4.80走。哈！見佢overshoot 到$5，而且PE仲係單位數，繼續炒上亦不過份，以為佢突破，自然上移目標價，放佢紙鳶啦。

奈何有日收市跌破$4.80，理應即走！點解無走到？因為佢第日開市$4.99，當時唔知佢只係迴光返照，以為係震完再上，於是係$4.92又再扑多棍。點知再過多兩日收市穿埋$4.80。其實已非常不對路，完全唔跟我認為個劇本行，所以應即放。

好嘞，第日開市又無放到，等佢穿埋短期上升軌$4.60，仲未放！其實一路掛緊$4.60, 奈何差一格，又唔想益佢。後來弄至$4.40清哂。若果跟策略行，穿$4.80就走，並唔白痴地$4.92 扑多棍，玩下手賺多過家下成倍。

隻真明麗又係，定咗個策略係去到上升軌個頂，即$3，就走人。又唔知仲咩，無掛到牌。跌破上升軌，變埋做下降軌，都仲未肯走，家下仲坐緊。由賺變蝕，究竟我做緊乜？點解唔肯走呢？可能係想賺返IPO個手蝕既返來。家下咪又仆街囉。

PS 呢隻野個莊好鬼衰格。周不時開市裂口夾上，愈升愈有，但臨尾市就殺返落來，好鬼陰濕。

呢個故事既教訓：紀律、紀律、紀律！定咗策略，穿位仲咩唔走？心理質素欠佳也！

(3) 唔好再in the hope that 乜乜柒柒

已寫大酒店hit 20天線入貨，但又無入到……

點解？In the hope that 個市會再跌, in the hope that 佢會試埋50天線。唉，策略定咗，無入到，今日收8.02, 只有係到呻，你係咪抵死？

呢個故事既教訓：個市係唔會錯既，錯既只會係你，唔好再有咁多咩主觀願望！

後記

今日同洛奇大佬討論一隻股，我問佢係咪呢幾個位係阻力位，又話係用上升通道搵出來的。

洛奇大佬就回應，話上升通道，以準繩度而言，月線＞周線＞日線；成份股＞大價股＞細股，而且有時會係自我炮制出黎(self-fulfilling)，所以佢只係輔助為主。

佢就主要係以大成交既頂／腳、BB、MACD、RSI 及STC 等，配合fundamentals 去揀股同睇位。

我深信大佬佢係唔會介意我係到post 出來既！

多謝洛奇大佬指點細佬！

大酒店 (0045)

2009-06-22T19:35:00.007+08:00

繼續後知後覺，想買入隻大酒店(0045)

想買入既原因如下：

基本面

個市死，少咗好多暴發中東油王來香港出風頭、飲花酒，呢類高級酒店自然食得應一應（向來甚少大陸自由淫光顧呢個級數既酒店，可以唔理佢地）。既然近排市場炒復甦，呢類殘花敗柳可能會彈得幾勁下。另一方面，雖然「筆直」仲要嚴控，但D老外公司點都係清哂庫存，要去我地祖國反下採購。順路途經香港住番一晚半晚半島，應該唔會被admin/finance插掛？上個星期路過，見佢代客泊車泊到滿哂，應該生意好轉。

話就話豬流感蔓延，旅遊業會首當其衝，但大酒店既主要客戶群應係退休有米仕、中東暴發戶及歐美大公司高層等，影響應該有限（佢區內主要競爭對手文華東方就話咗豬流感暫時對佢地無咩影響）。

除2008年外，盤數呢幾年都無咩大波動，算係穩定增長個隻（太懶，無啃年報，數據只係靠財華網個database）。舊年NI大跌應係assets revaluation累事。

呢幾年落力減債，capex 高峰亦應該暫時過咗，縱使來年需舉債，亦應不成問題。

有研究過佢盤數既味皇大大曾指出呢隻野在處理depreciation上大有問題（假設酒店建築個useful life 係75-150年！）。不過阿味皇大大話restate 後既股價都應有$9.6左右，算做有啖苦飯食下咁啦。

最後呢點頗為重要：就係大股東同高層近排頻頻增持。

技術面

技術上水牛市（借用洛奇大佬既term）已經確認。唔似其他藍籌或H 股，呢隻野突破咗250天線只係無幾耐。雖然仲未穿番落去，但RSI 頗高，再加埋上破4月形成既上升區間後就見回吐，股價短期可能會調整。

點解覺得只係調整，唔係轉勢呢？佢日線50尚未穿250（只有10升穿250, 其他全部未），但個市極有機會係水牛，穿埋應只係時間問題，而且周線10穿50, 周線EMA 剛剛過零，應該只係調整下。

今朝佢好地地由8雞跌到落7.70, 搞到我鬼死咁開心，點知尾市唔知邊條粉頭炒高佢成幾仙，收7.75, 企番係條10天線上，搞到好鬼掃興。若果調整下試20天線，會入返些少。希望可以上到十個大洋，賺返30個巴仙咁啦。

港紙資金流向

2009-06-19T19:18:00.016+08:00

坊間D報紙同埋財演，成日係到吹香港水浸，個市想跌都難。搵餐飯仔吃，佢地講既野，有幾多價值，心照啦。水浸，係一個好好既一個term去解釋個市點解會升。家下個市開始有調整，「水浸」呢個名詞，自然消失咗。

好嘞，究竟點睇香港有冇水浸呢？或者正確既講法，係點睇港元既資金流向呢？由於香港資金絕對流通，除非你係做緊違法行為（i.e. 你踩到金管局上心口。若果唔係，佢地會唔會理就心照啦），基本上係無辦法keep track 港元資金流向。

咪住！香港行聯匯，理論上可從銀行體系資金流動性同外匯儲備睇到D端倪。但係自2005年推出既所謂「優化」措施後，以上兩個指標係唔再work咖啦！要睇資金流向同水浸程度，要睇其他指標。（若果只係想知個結輪，請飛去個thread 底）

簡單咁講，就係外面D人想入香港買野，請你先買港紙。港紙搵邊個買？銀行囉，銀行賣咗港紙畀你，唔係收你條毛或者黃金，係收你外幣。同一時間，佢地收埋D外幣係到唔會生金蛋，會放返出去，一出一入，銀行會有個net foreign currency asset exposure 剩咗出黎。換句話說，銀行體系個FCY net position 係咁上，可以理解為外來資金湧港，水浸銀行。

既然銀行都知道唔會生金蛋，又買唔到其他野，又唔想焗坐，可以點？答案就係就叫金管局啃咗佢！呢個就係聯匯現時既操作方式。D 錢點過銀行到？就係過落佢地開係金管局個戶口到。呢堆戶口既總結餘，就係坊間成日講既銀行體系總結餘，Aggregate Balance (AB) 嘞。日常聽到話金管局係外匯市場干預，其實就係幫D銀行食外幣，沽港銀畀佢地。所以正確D講，AB+FCY 先係响港元市場既「水」。

睇Chart 1, 你會發現基本上所謂既AB 向來只係佔「水」既一小部份。係呢輪突然多咗，點解？可能係銀行避險，要金管局食多D掛。

Chart 1

好嘞，齋睇呢幅圖，只係估計有幾多「水」係到。呢D「水」唔一定係買股，可以買樓，可以食息，乜都得。但最緊要係，家下既水，遠低於32,000點個陣，即係2007 年第三第四季。

水多，唔代表個市會升，銀行唔放水，佢鍾意焗坐，你吹咩？吖，之不過，銀行係搵錢的，焗坐得多得滯，佢會蝕錢。有咩指標可以睇到銀行放唔放水呢？有一樣野叫貸存比率(loan-to-deposit ratio)。呢個ratio 跌，一係就係loan growth 跌得快過deposit growth, 一係就deposit growth快過loan growth。後者方係資金流入，銀行水浸。前者只係銀行避險，唔肯放水，實體經濟食屎！

Chart 2

睇樓上Chart 2, 你睇到兩者係成反比：銀行食得咁上下外來資金(net fcy assets 升)，LDR會跌。但樓上講咗，LDR跌可以係兩個唔同既情況，係上述邊個情況先？

有來多張圖。睇Chart 3, 好明顯，2005到07, 係D 錢不斷湧入來，港元既deposit growth > loan growth。2008年，對唔住，係loan growth > deposit growth, 兼且deposit growth 走入負數，換句話說，係資金流出！呢個情況直到今年三月先有逆轉，即係可能D水又開始返來嘞。但兩個月既data, 不足以確認趨勢，要睇多些少時間。Deposit 同loan 個growth rate 都係對比起上年 (yoy)

Chart 3

仲有其他指標睇資金流向既。某美資行就用Change in HK$M3減Change in HK$ loan (對比起上一個月)做資金流向，仲聲稱可以好「確實」咁計到流入咗幾多咁話喎。粒數可唔可信我就唔知，不過睇個數係正定負，同個幅度有幾大，就合理。個數實際有幾多，可以不理。Chart 4就係用上述方法計出來既，亦確認左三月資金流向開始轉勢。

Chart 4

Chart 5 則係坊間常用既水源充裕指標，HK$ M3 growth yoy. 本住人有我有既精神，都要貼佢一貼。其實，咪由係確認同一個方向～

Chart 5

－－－－－－－－－－－－－－－－－－－－－－－－－－－

講咗一大爛餐，結論係，今年三月打後有資金流入，目前睇到，四月仲有流入，五月數據未出，睇唔到。但係五月個陣金管局又食咗銀行幾次錢，你話無流入，我打死都唔信。

既然呢D方法要靠DATA, 金管局D DATA 又出得咁慢，有咩方法可以即時睇到資金出定入先？若果你有港紙FX spot, 12M forward, HIBOR (O/N, 1M, 3M 夠哂)既即市串流，就得嘞。但有得錢買呢D串流既，一係你係大戶，D資金根本就係你既，你梗知流入定流出；一係就已經上哂岸，咁你仲炒咩很野股呀？